Patuloy na pagsisikap ng administrasyon ni Pangulong Ferdinand R. Marcos Jr. na palawakin ang access ng mga Pilipino sa dekalidad na serbisyong pangkalusugan sa pamamagitan ng mas pinaigting na Philippine Health Insurance Corporation (PhilHealth) coverage.

Personal na bumisita si Pangulong Marcos sa The Medical City sa Ortigas, Pasig City nitong Lunes upang inspeksyunin ang mga serbisyo ng ospital at alamin ang implementasyon ng pinalawig na benepisyo ng PhilHealth.

Ayon sa Palasyo, tampok sa inspeksyon ang mga dagdag na benepisyo ng PhilHealth kabilang ang maternity care package at outpatient emergency care benefits.

Kasama ng Pangulo sa pagbisita si PhilHealth President at CEO Dr. Edwin Mercado.

Pagdating sa ospital, ininspeksyon ni Pangulong Marcos ang mga urgent at non-urgent care areas kung saan nakipag-usap siya sa mga pasyente at kanilang mga pamilya habang naghihintay ng serbisyong medikal.

Nagtungo rin ang Pangulo sa ika-10 palapag ng ospital upang bisitahin ang male surgery ward, mother-and-baby-friendly room, at female surgery ward.

Sa isinagawang inspeksyon, personal na nasaksihan ng Pangulo kung paano naipagkakaloob sa mga pasyente ang mga serbisyong suportado ng PhilHealth.

Sinalubong ang delegasyon ni Dr. Stuart Bennett, Presidente at CEO ng The Medical City, na siyang nanguna sa pag-iikot sa Alfredo R.A. Bengzon Patient Access Ward at sa makabagong Emergency Department ng ospital.

Sa kanilang pag-iikot, nakipagpulong sina Pangulong Marcos at Dr. Mercado sa ilang pasyente na nagbahagi kung paano nakatulong ang kanilang PhilHealth membership upang mabawasan ang gastusin sa pagpapagamot at pagpapaospital.

Nakatutok din ang pagbisita sa kung paano nakatutulong ang pinal na benepisyo ng PhilHealth upang mapalawig ang access ng publiko sa mahahalagang serbisyong medikal, partikular sa emergency care at maternal health.

Itinatag ang Alfredo R.A. Bengzon Patient Access Ward upang makapagbigay ng abot-kaya at dekalidad na serbisyong pangkalusugan at maisulong ang mas inklusibong healthcare experience para sa mga Pilipino.

Samantala, patuloy namang nagbibigay ang Emergency Department ng The Medical City ng makabago at komprehensibong emergency care sa pamamagitan ng modernong pasilidad at specialized medical teams na kinikilala ng Joint Commission International.

Ayon kay Dr. Bennett, nananatiling committed ang The Medical City sa pagsuporta sa mga programang nagpapalawak ng access sa dekalidad na healthcare para sa mga Pilipino.

Dagdag pa niya, nakatutulong ang mas matibay na ugnayan ng ospital, PhilHealth, at pamahalaan upang mas marami pang pasyente at pamilya ang makinabang sa makabuluhang serbisyong pangkalusugan.

Ipinakita ng pagbisita ang sama-samang layunin ng pamahalaan, PhilHealth, at mga institusyong pangkalusugan na gawing mas accessible, responsive, at abot-kaya ang dekalidad na serbisyong medikal para sa lahat ng Pilipino. | PND