Ako ay nagmasid sa punso ng langgam, Lahat may gawaing pinag-abalahan, Bawa’t isa’y kilos sa dapat gampanan, Kaya ang kolonya ay may kaayusan.
Ang tao ganyan din sa mga serbisyo, Sa army at navy, sila ang sundalo, Dahil sa ang lahat bahagi ng grupo, Para silang langgam, may pakay na solo.
Datapwa’t sa atin namang hanapbuhay, Laluna at merong negosyo sa bahay, Walang hati-hati pag kulang ang suhay, May-ari’y janitor sa kanyang pagsikhay.
Sapagka’t kung bawa’t gawain may tao, Ay baka malugi ang isang negosyo, Hindi kakayanin ang ganyang epekto, Kaya isang tao, maraming serbisyo.
Malaking kompanya na napakayaman, Bawa’t tao’y merong trabahong kanya lang, Ganyan alagaan kanyang kapakanan Na espesyalista sa bawat gampanan.
Puhunang maliit ang isang batayan, Na gawa ng tao’y iba’t-ibang bagay, Puhunang malaki ay di naman ganyan, Ang bawat posisyon, gawain isa lang.
Hanap-buhay naman, di lang hanap-buhay, Ito’y buong buhay ng ating lipunan, Ang bawa’t negosyo’y lilikha ng suhay, Ang bawa’t trabaho’y lilikha ng yaman.
Sa magnegosyo man at kung magtrabaho, Kailangan ay tuwid ang gawi sa mundo, Sapagka’t batid kong sa ganyang estilo, Makakamit lagi ay mga asenso.
