Tatlong miyembro ng Cavite State University (CvSU) Hornets Badminton Team ang kuwalipikadong maging kinatawan ng Pilipinas sa nalalapit na 31st Summer World University Games (SWUG) na gaganapin sa Chengdu, Sichuan Province, China sa Hulyo 27 hanggang Agosto 8, 2023.

Nakuha nila ang kanilang kwalipikasyon sa pamamagitan ng paghakot ng una at ikalawang puwesto sa 6th National Student Badminton Championship na ginanap sa Bataan Youth Center, Balanga City noong Pebrero 11 at 12, 2023.

Ang torneo ng badminton ay inorganisa ng Federation of School Sports Association of the Philippines (Fessap), sa pakikipagtulungan ng BPSU, na naglalayong piliin ang top 2 student-athletes na kakatawan sa Pilipinas para sa nalalapit na malaking palaro.

Ang women’s division champion na si Rhealyn Villar ay isang 4th year Bachelor of Science in Information Technology student habang ang second placer na si Allysa Laylo ay isang 3rd year Bachelor of Science in Accountancy (BSAcc) student.

Para sa men’s division, nasa pangalawang pwesto naman si Mark Arman Rimas, 1st year Bachelor of Science in Business Management (BSBM).

Ang 31st Summer World University Games, na karaniwang kilala bilang Chengdu 2023 FISU World University Games, ay isang multi-sport event na pinahintulutan ng International University Sports Federation (FISU).(Go Cavite)